Job 33

1 ^a“Kaakano ggwe Yobu, wuliriza ebigambo byange:
ssaayo omwoyo ku byonna bye njogera.
2Laba nnaatera okwasamya akamwa kange,
ebigambo byange bindi ku lulimi.
3 ^bEbigambo byange biva mu mutima omulongoofu;
olulimi lwange, mu bwesimbu, lwogera bye mmanyi.
4 ^cOmwoyo wa Katonda ye yankola,
era omukka gw’oyo Ayinzabyonna gumpa obulamu.
5 ^dOnnyanukule nno bw’oba osobola,
teekateeka ebigambo byo onjolekere.
6 ^eLaba, nange ndi ggwe mu maaso ga Katonda.
Nange nava mu bbumba.
7 ^fTobaako ky’otya,
sijja kukunyigiriza.
8Ddala ddala oyogedde mpulira,
ebigambo byennyini mbiwulidde ng’ogamba nti,
9 ^gNdi mulongoofu sirina kibi,
siriiko musango so mu nze temuli butali butuukirivu.
10 ^hKyokka Katonda anteekako omusango,
anfudde omulabe we.
11 ⁱAsiba ebigere byange mu nvuba,
antwala okuba omulabe we.

12 ^j“Naye leka nkubuulire, mu kino toli mutuufu.
Katonda asinga omuntu.
13 ^kLwaki omwemulugunyiza nti,
taddamu bigambo bya muntu yenna?
14 ^lKubanga Katonda ayogerera mu ngeri emu, n’awalala n’ayogerera mu ngeri endala,
wadde ng’omuntu tassaayo mwoyo.
15 ^mMu kirooto mu kwolesebwa ekiro
ng’otulo tungi tukutte abantu
nga beebase ku bitanda byabwe,
16 ⁿaggula amatu g’abantu,
n’abalabula n’ebyekango,
17alyoke akyuse omuntu okumuggya mu bikolwa ebibi
n’amalala,
18 ^oaziyize emmeeme ye okukka mu bunnya,
n’obulamu bwe buleme okuzikirira n’ekitala.

19 ^p“Omuntu ayinza okubonerezebwa, olumbe ne lumulumira ku kitanda kye,
n’alumwa olutatadde mu magumba ge,
20 ^qobulamu bwe ne bwetamira ddala emmere,
emmeeme ye n’ekyayira ddala ebyassava.
21 ^rOmubiri gwe gugwako ku magumba,
n’amagumba ge ne gafubutukayo gye gaali geekwese,
22 ^semmeeme ye n’esembera kumpi n’obunnya;
obulamu bwe ne bulaga eri abo abaleeta okufa.
23 ^tSinga wabaawo malayika ku ludda lwe,
amuwolereza, omu ku lukumi,
okubuulira omuntu ekigwanidde;
24 ^uyandimukwatiddwa ekisa n’amugamba nti,
‘Muwonye aleme kusuulibwa magombe,
mmusasulidde omutango,’
25 ^vomubiri gwe guzzibwa buggya ng’ogw’omwana omuwere,
era guddayo ne gubeera nga bwe gwali mu nnaku ze ez’obuvubuka.
26 ^wOmuntu asaba Katonda, Katonda n’amukwatirwa ekisa.
Alaba amaaso ga Katonda n’ajaguza n’essanyu,
Katonda n’amuddiza nate ekifo kye eky’obutuukirivu.
27 ^xAwo omuntu n’akomawo eri abantu n’abagamba nti,
Nayonoona, ne nkola ekyo ekitaali kirungi,
naye ne sibonerezebwa nga bwe kyali kiŋŋwanidde.
28 ^yYanunula emmeeme yange n’amponya okukka mu bunnya;
kyenaava mbeera omulamu ne nsigala nga mpoomerwa ekitangaala.

29 ^z“Bw’atyo Katonda bw’akola omuntu
emirundi ebiri oba esatu,
30 ^aaokuzza emmeeme ye ng’agiggya emagombe,
ekitangaala eky’obulamu kimwakire.

31“Yobu, weetegereze nnyo, ompulirize;
siriikirira nkubuulire.
32Bw’oba ng’olina eky’okwogera kyonna, nziraamu;
yogera kubanga njagala wejjeerere.
33 ^abBwe kitaba kityo, mpuliriza;
sirika nange nnaakuyigiriza amagezi.”